ಮಂಗಳೂರು (ಮಹಾರಾಷ್ಟ್ರ): ತಾಯಿಯ ನಿಷ್ಕಲ್ಮಶ ಪ್ರೀತಿಗೆ ಈ ಘಟನೆ ಜ್ವಲಂತ ನಿದರ್ಶನ. ಮಗನನ್ನು ರಕ್ಷಿಸುವ ತಾಯಿಯ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರಿಂದ ಪ್ರಶಂಸೆ ವ್ಯಕ್ತವಾಗಿದೆ.
ಮಹಾರಾಷ್ಟ್ರದಲ್ಲಿ ಹಾಡಹಗಲು ಬೈಕ್ ಮೇಲಿದ್ದ ಯುವಕನ ಮೇಲೆ ಲಾಂಗ್ ನಿಂದ ರೌಡಿಗಳು ದಾಳಿ ನಡೆಸಿದ್ದಾರೆ. ಈ ಸಮಯದಲ್ಲಿ ಮಗನ ಪಕ್ಕದಲ್ಲೇ ನಿಂತಿದ್ದ ತಾಯಿಗೆ ಅದು ಏನು ಅನ್ನಿಸಿದೆಯೋ ಗೊತ್ತಿಲ್ಲ ಆದರೆ ಕ್ಷಣ ಮಾತ್ರದಲ್ಲಿ ನಡೆಯ ಬಹುದಾದ ಅನಾಹುತವನ್ನು ಗ್ರಹಿಸಿದ ಆ ತಾಯಿ ಮಗನ ಮೇಲಾಗುವ ದಾಳಿಯನ್ನು ತಡೆದಿದ್ದಾರೆ. ಮಗನನ್ನು ರಕ್ಷಿಸುವುದರ ಜೊತೆಗೆ ಲಾಂಗ್ ಹಿಡಿದು ದಾಳಿ ಮಾಡಲು ಬಂದ ಪುಂಡರ ಮೇಲೆ ಕಲ್ಲು ತೂರಿ ಅವರನ್ನು ಹಿಮ್ಮೆಟ್ಟಿಸಿದ್ದಾರೆ. ಮಗನ ರಕ್ಷಣೆಯೇ ಧ್ಯೇಯವಾಗಿದ್ದ ಆ ತಾಯಿ ತನ್ನ ಮೇಲೂ ಪುಂಡರು ಲಾಂಗ್ ಬೀಸಬಹುದು ಎಂಬ ಭಯವಿಲ್ಲದೇ ರೌಡಿಗಳನ್ನು ಅಟ್ಟಾಡಿಸಿ ಸ್ಥಳದಿಂದ ಕಾಲು ಕೀಳುವಂತೆ ಮಾಡಿದ್ದಾಳೆ.
ತಾಯಿಯ ಸಮಯ ಪ್ರಜ್ಞೆ, ಚಾಣಾಕ್ಷತನ, ಧೈರ್ಯದಿಂದ ಮಗ ಅಪಾಯದಿಂದ ಪಾರಾಗಿದ್ದಾನೆ. ಮಗ ಅಘಾತದಿಂದ ಏನಾಗುತ್ತಿದೆ ಎಂದು ಅಂದುಕೊಳ್ಳುವಷ್ಟರಲ್ಲಿ ತಾಯಿ ಎಲ್ಲವನ್ನು ಮುಗಿಸಿ ಬಿಟ್ಟಿದ್ದಾಳೆ. ಈ ಘಟನೆ ಆ.18ರಂದು ಮಧ್ಯಾಹ್ನ 1:30ರ ಸುಮಾರಿಗೆ ಕೊಲ್ಲಾಪುರದ ಜಯಸಿಂಗ್‌ಪುರ ಪ್ರದೇಶದಲ್ಲಿ ನಡೆದಿದ್ದು, ಇಡೀ ಘಟನೆ ಸ್ಥಳೀಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಮೂವರು ದಾಳಿಕೋರ ಪುಂಡರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಈ ಹಿಂದೆ ಬೈಕ್ ಮೇಲಿದ್ದ ವ್ಯಕ್ತಿ ದಾಳಿಕೋರರ ಜತೆ ಜಗಳವಾಡಿದ್ದನ್ನೇ ನೆಪವಾಗಿಟ್ಟು ಅಟ್ಯಾಕ್‌ ಗೆ ಮುಂದಾಗಿದ್ದರು ಎಂದು ಪೊಲೀಸ್‌ ಮೂಲಗಳು ತಿಳಿಸಿದೆ.
ವಿಡಿಯೋಗಾಗಿ ಇಲ್ಲಿ ಕ್ಲಿಕ್‌ ಮಾಡಿ
https://x.com/i/status/1825495767710109821
