ಕೊಲ್ಲುವವನಿಗಿಂತ ಕಾಯುವವನು ಮೇಲು – ಸಾವಿನ ದವಡೆಯಿಂದ ಪಾರಾದ ಪ್ರಯಾಣಿಕ, ವಿಡಿಯೋ ವೈರಲ್

June 7, 2024

ಮಂಗಳೂರು/ಕೇರಳ: ಈ ಘಟನೆ ನಡೆದಿರುವುದು ಕೇರಳದಲ್ಲಿ. ಮಲಬಾರ್ ಬಸ್ನ ಸಿಸಿಟಿವಿಯಲ್ಲಿ ಸೆರೆಯಾಗಿರುವ ಈ ದೃಶ್ಯ ಎಲ್ಲರನ್ನು ಬೆರಗುಗೊಳಿಸುತ್ತದೆ. ಸಾವಿನ ದವಡೆಯಿಂದ ಮನುಷ್ಯ ಕೊನೆ ಕ್ಷಣದಲ್ಲಿ ಹೇಗೆ ಪಾರಾಗುತ್ತಾನೆ ಎನ್ನುವುದಕ್ಕೆ ಈ ದೃಶ್ಯವೇ ಸಾಕ್ಷಿ.

ದೃಶ್ಯದಲ್ಲಿ ಕಾಣುವ ಈ ಪ್ರಯಾಣಿಕ ಬಸ್ ಏರಿ ಟಿಕೆಟ್ ಖರೀದಿಸಲು ಮುಂದಾಗುತ್ತಾನೆ. ಚಲಿಸುವ ಬಸ್ ನಲ್ಲಿ ನಿಂತಿದ್ದ ಈತ ಆಯತಪ್ಪಿ ಬೀಳುತ್ತಾನೆ. ಆತ ಬಿದ್ದ ರಭಸಕ್ಕೆ ಬಸ್ನಿಂದ ಹೊರಕ್ಕೆ ಬೀಳುವ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಆದರೆ ಕಂಡೆಕ್ಟರ್ ತಕ್ಷಣ ಆತನ ಕೈ ಹಿಡಿದು ಬೀಳದಂತೆ ತಡೆದು ಬಚಾವ್ ಮಾಡಿದ್ದಾನೆ. ಈ ದೃಶ್ಯ ಬಸ್ಸಿನ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು ಇನ್ನಿಲ್ಲದಂತೆ ವೈರಲಾಗಿದೆ. 19 ಸೆಕೆಂಡುಗಳ ವಿಡಿಯೋ ಇದಾಗಿದ್ದು 5 ಸೆಕೆಂಡ್ನಲ್ಲಿ ಈ ಘಟನೆ ಸಂಭವಿಸಿದೆ. ಕಂಡೆಕ್ಟರ್ ಸಮಯ ಪ್ರಜ್ಞೆಯಿಂದ ಪ್ರಯಾಣಿಕನಿಗೆ ತನ್ನ ಕೈ ಚಾಚದೆ ಇರುತ್ತಿದ್ದರೆ ಆ ಪ್ರಯಾಣಿಕ ಬಸ್ನಿಂದ ಹೊರಕ್ಕೆ ಬಿದ್ದು ಪ್ರಾಣ ಕಳೆದುಕೊಳ್ಳುವ ಅನಾಹುತವೇ ಸಂಭವಿಸಬಹುದಾಗಿತ್ತು. ಅದೃಷ್ಟವೆಂಬಂತೆ ಕಂಡೆಕ್ಟರ್ನಿಂದಾಗಿ ಬಸ್ ಪ್ರಯಾಣಿಕ ಬದುಕುಳಿದಿದ್ದಾನೆ. ಈ ಘಟನೆ ವೇಳೆ ಸಹ ಪ್ರಯಾಣಿಕರೊಬ್ಬರು ತಕ್ಷಣ ಎಚ್ಚೆತ್ತುಕೊಂಡು ಡೋರ್ ಎಳೆದಿದ್ದಾರೆ. ಮತ್ತೊಬ್ಬ ಪ್ರಯಾಣಿಕನ ಚೀರಾಟ ಕೇಳಿ ಡ್ರೈವರ್ ಬಸ್ ನಿಲ್ಲಿಸಿದ್ದಾರೆ. ಒಟ್ಟಿನಲ್ಲಿ ಕ್ಷಣಾರ್ಧದಲ್ಲಿ ನಡೆದ ಘಟನೆಯಲ್ಲಿ ಪ್ರಯಾಣಿಕ ಸಾವಿನ ದವಡೆಯಿಂದ ಜಸ್ಟ್‌ ಮಿಸ್‌ ಆಗಿ ಪಾರಾಗಿದ್ದಾನೆ. ಇನ್ನು ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು ಜೀವ ರಕ್ಷಿಸಿದ ಕಂಡೆಕ್ಟರನ್ನು ಅನೇಕರು ಪ್ರಶಂಸಿದ್ದಾರೆ.