ಮಂಗಳೂರು: ಡಾ. ಎಂ.ವಿ ಶೆಟ್ಟಿ ಫಿಸಿಯೋಥೆರಪಿ ಕಾಲೇಜಿನಲ್ಲಿ ಸೆ.03ರಂದು ‘ಫಿಸಿಯೋ ಸಪ್ತಾಹ – 2024’ ಉದ್ಘಾಟನೆಗೊಂಡಿತು. ಇದರ ಪ್ರಯುಕ್ತ ‘ವೆಲ್ ನೆಸ್ ವಾಕಥಾನ್’ಗೆ ಕಾಲೇಜು ಕ್ಯಾಂಪಸ್ ನಲ್ಲಿ ಚಾಲನೆ ನೀಡಲಾಯಿತು. ಕರ್ನಾಟಕ ರಾಜ್ಯ ಅಲೈಡ್ ಹೆಲ್ತ್ ಕೇರ್ ಕೌನ್ಸಿಲ್ ನ ಅಧ್ಯಕ್ಷರಾಗಿರುವ ಪ್ರೊ. ಡಾ. ಯು ಟಿ ಇಫ್ತಿಕಾರ್ ಅಲಿ ಅಹಮ್ಮದ್ ಅವರು ಈ ವಾಕಥಾನ್ ಗೆ ಚಾಲನೆ ನೀಡಿದರು. ‘ವಿಶ್ವ ಫಿಸಿಯೋಥೆರಪಿ ದಿನ – 2024’ ಪ್ರಯುಕ್ತ ಕಾಲೇಜು ವತಿಯಿಂದ ವಾರಪೂರ್ತಿ ‘ಫಿಸಿಯೋ ವೀಕ್’ ಆಗಿ ಆಚರಿಸಲಾಗುತ್ತಿದೆ.
ಈ ಸಂದರ್ಭದಲ್ಲಿ ವಿದ್ಯಾರ್ಥಿಗಳು ಮತ್ತು ಕಾಲೇಜಿನ ಸಿಬ್ಬಂದಿ ವರ್ಗದವರು ಕಾಲೇಜಿನಿಂದ ಕಾವೂರು ಜಂಕ್ಷನ್ ವರೆಗೆ ಜಾಥಾದಲ್ಲಿ ಸಾಗಿ ಬಂದು ಸಾರ್ವಜನಿಕರಿಗೆ ಕರಪತ್ರಗಳ ಮೂಲಕ ಫಿಸಿಯೋಥೆರಪಿಯ ಉಪಯುಕ್ತತೆ ಮತ್ತು ವಿಚಾರಗಳ ಕುರಿತು ಮಾಹಿತಿ ನೀಡಿದರು.
